تصحيح_مفاهيم_وتوعية
لقاحات_الأطفال_سؤالاً_وجواب ‼️
ما هو مبدأ اللقاح ؟
اللقاح بيشتغل على أساس أني أعطي الجسم هالعدو الغريب إما ميت خالص أو ضعيف أو جزء منو حتى يقدر جهاز المناعة يحفظو ويشكل أسلحة ضدو منشان إذا زار مرة تانية تكون كل القوى المسلحة جاهزة للتصدي .
هل ممكن أن يعمل اللقاح عند الشخص المرض ؟
وقت يكون اللقاح جرثومة ميتة فمستحيل يعمل مرض بس إذا كان ضعيف أو جزء منو اي ممكن بس بكون خفيف ما بيوصل لشدة المرض لو انصاب فيه بدون ما يكون آخد اللقاح .
هل أخذ اللقاحات بأوقات قريبة ممكن يأذي الطفل ؟
جداول اللقاحات لم تأت من عبث .. في دراسات وأبحاث وعلم حط هالجداول وهالأوقات وهيي الوحيدة الصح لهيك التزموا بالجداول ولا تخترعوا أوقات جديدة لأنها ممكن تضر أو ما تفيد .
ماذا يمكن أن يحدث مع الطفل بعد اللقاح ؟
ممكن يصير تورم أو احمرار أو ألم مكان الحقنة وهاد طبيعي ما بخوف بروح لحالو خلال كم يوم .
ممكن يصير معو حرارة وهون كتير بيسألوا الأهالي شو نعمل بس تصير معو حرارة ؟
الحرارة شي منيح بتدل عأنو المناعة شغالة ومثابرة وسريعة بالتصدي .. بس يصير مع ابنكم حرارة قيسوها إن كانت من 37.8 ل 39 فهي خفيفة لا تعطي فيها أدوية ممكن بس تلبسوا لبس خفيف وتحط كمادات مي معتدلة .
وإن كانت فوق ال39 حاكي دكتور الأطفال ليعطيه خافضات حرارة بناءاً على عمر ابنك ووزنو .
على كل حال حتى الحرارة ما بتضل بتروح لحالها خلال يومين .. والشي الوحيد يلي بخليك تخاف من ما بعد اللقاح أنك تشوف شي غير طبيعي بعدو متل طفح قوي أو حالة عامية سيئة .. رح تقدر تميز لحالك لا تقلق .
كيف يمكن أن اجعل ابني بحالة جيدةبعد اخذ اللقاح ؟
إن كان رضيع ممكن تلفو بشكل ناعم تنيمو على جنبو أو بطنو وتهزلو وتعطيه لهايتو .. حطلو موسيقى ودلكلو حول مكان الحقن بلطف ولا تقلق لأنو الطفل بيتأثر بقلقك .
إن كان أكبر كترلو سوائل وحاول الهيه بشي بحبو .
هل يمكنني أن احمم الطفل بعد اللقاح ؟
بتقدر ايمت ما بدك بس الفكرة أنو الطفل بكون خايف من فكرة خلع التياب وأحياناً بتندقر مكان الحقنة بتوجعو أو بكون الطفل مو طايق حالو فبيبكي بالحمام بس علمياً ما في أي ضرر من الحمام لا قبل ولا بعد اللقاح .
اللقاح ممكن يعمل توحد عند الطفل ؟
هبد وخرافات وطلعت بزمانتو دراسة قال في علاقة والدكتور يلي نشرها سحبولوا الشهادة خطيتو 🤦🏻♀️ اللقاحات آمنة مية بالمية .
هي كانت ربما أشيع ما سأل عن اللقاحات وإذا عندكم أي استفسارات أنا جاهزة .
كل الحب والصحة لقلوبكم وقلوب أطفالكم .
كنت معكم سَماح صالح محمد ♥️