قصص سريرية :
من كم يوم كان عندي ولادة طبيعية و بعد ما خلصت و أنا قاعد عم أخد إستراحة محارب و عم أحتسي ال 3ب1 بسمع صياح و ولوييييييل … مديت راسي
لأشوف إش في ما في … و إذ برجال كبير بالعمر شايل بين إيديه صبية صغيرة لا من تمها و لا من كمها .
الرجال عم يبكي بحرقة و عم يصيح عم تتنفس عم تتنفس .
إستنفرت المشفى بكل عناصرها … اللي عم يفتح أوردة و اللي عم يسحب دم و اللي عم يجهز غرفة العمليات .
و خلال ثواني كانت الصبية ع طاولة العمليات الضغط مو مسموع …. النبض مو مجسوس و نزيف في حضرة الموت .
شقيت البطن و لاقيت “”””رحم متمزق و جنين متوفي و خثرات دموية كبيرة و كتيرة .
بلشت أشتغل بسرعة … لأنه كل ثانية إلها قيمة … و لازم أسبق النزف لأقدر أسيطر عليه .
« الحمد الله »
سيطرت على النزف و حافظت على الرحم
بس … لسه ما خلصت … بدي دم … بدي كميات
كبيرة من الدم و البنت زمرتها ( سلبي AB ) و
الساعة تنتين بعد نص ليل .
و هون … تذكرت إني مبيت بالمشفى مريضة
عندها كتلة عرطلة … كل المؤشرات بتقول إنها
خبيثة .
عمليتها بعد كم ساعة … وزمرة دمها ( سلبي AB )
و مجهزلها ست وحدات دم و كيسين بلازما .
و بدون تردد …رحت لعندها … دقيت الباب فتح
إبنها و قبل ما سلم عليه .
قلتله … بدي الدم … عندي صبية عم تنزف و لازمها دم .
الشب … فكر شوي و بعدين قلي :
أنا آسف … ما بحسن … عمليتنا بعد شوي .
قلتله : البنت بين الحياة و الموت .
قلي : الزمرة نادرة و بألف ياويلاه أمنت متبرعين .
دكتور … أنا آسف ____ بس مافيني .
طرقت راسي بالأرض و مشيت … و إذ بالحجة
بتصيح من جوات الغرفة … دكتور خود الدم ،
لا ترد عليه .
أنا كبيرة و عمري صار وراي … بس مريضتك صغيرة و العمر لسه قدامها .
أخدت الدم و بسرعة بلشنا ننقله … مريضتنا
عم تتحسن ببطىء و ع الساعة سبعة الصبح
بلشت تصحصح .
ع الساعة تمانة … رحت لعند الحجة
قلتلها :
إمي … راح أجلك العملية لبين ما نأمن دم .
قالتلي :
لاااااااااااااااااااااااااااااااا … توكل على الله
اللي الله كاتبه بده يصير .
قلتلها :
بس عمليتك كتير صعبة .
قالتلي :
الله … راح يسرها .
بصراحة … كنت كتير خايف من هالعملية .. بس
كلامها ريحني .
توكلت ع الله و دخلتها غرفة العمليات .
وابنها كان عم يأمن دم بهل وقت.
العملية … كانت و لا أسهل من هيك
و قدرت شيل الكتلة كلها و بدون نزف يذكر .
و ” الله ” بعدي إسمه كملها معنا .. وطلعت
نتيجة التحليل سليمة .
د . أمين صالح قبنض
اقرأ جراحة تصحيح النظر/ الجراحة الانكسارية(كل ما تريد معرفته عنها)