fbpx

قصة كفاح وإرادة للإنتصار على السرطان.. رحلة سالي مع المرض

اللي أصعـب من السـرطان ›› أنـك تكوني بنـت بـلا شــعر.
لما بلش يهر شعري بعد الجرعة الرابعة كان صعب علي اقدر استوعب كمية الاسئلة يلي براسي.
كيف ممكن يكون شكلي بلا شعر
كيف رح يشوفوني يلي حولي؟
كيف امي رح تقدر تشوفني هيك؟
كيف انا رح اقدر اطلع بين الناس؟
واسئلة كتير
كان الحل لكل هالأفكار اني واجهها.
ووقتها قررت أنا احلق شعري بإيدي قبل مايهر هوي لحالو ع الأخير..
وهون لقيت قوتي وراح خوفي الأول مني.
وبلش معو قلق تاني “انو لازم خبي شكلي الجديد”.
اشتريت قمطة وشفت شو عندي طواقي بالبيت.
› بـس اللي صـار ↞ انو لما بلشت حطهن واستعملهن ضاعت قوتي وبلشت أكره شكلي الجديد.
لما اطلع غطي راسي بس من جواتي كون ناطرة ارجع ع البيت لحتى شيلها واتطلع ع حالي بالمراية وارجع شوف حالي متل ما أنا.
#مواجهة_الألم أعظم قوة عليه
لهيك سألت حالي مين قال أنو البنت المريضة بالسرطان عيب تكون بلا شعر أو لازم تغطي راسها لما ببطل عندا شعر؟
مين قال انو أنوثة البنت بس بشعرها!
وقـررت إني واجه هي الفكرة واطلع من البيت بلا ما غطي راسي، وبدون ما أخجل »› أنا #سالي كيف ماكان شكلي بشعر او بلا.
دوروا ع القوة يلي جواتكون ولاتسمحوا لشي يقيدكون انتو قوة حالكون وانتو فيكن تنتصروا ع المرض بإرادتكن وابتسامتكن❤️
السرطان لايعني النهاية، السرطان يعني رحلة كفاح للانتصار في النهاية.
•• سـالي موســى.
أعظـم انتصـارات المــرء انتصـاره علـى مخاوفــه، الحـبّ وكـلّ الحـبّ منّـا نحن فريق سماعة حكيم ⇜ لسـالي، ونتمنى لها الشفاء العاجل💕