فلوديا_والتصلب_اللويحي 💔
يا ياااما مأحلاها طالعة من حلقك.. هيك دوماً كان يتغزل طارق الولهان بفلوديا بنت الخربة ❤️ بس فلوديا طلع الها قصة مميزة أكتر من طريقة كلامها وحبها وأفكارها.. قصة ألم وأمل وكتير من المقاومة!
فلوديا فجأة بتصير ما عاد تشوف منيح.. وكل ما حركت عينها بتتالم.. بيصعب عليها تميز الألوان وخاصةً لون الوردة الحمرا.. ممكن توصل معها لمرحلة العمى التام بعين من عيونها 💔
وممكن بهالهجمة تتأذى أعصاب وجهها فيصير معها لقوة وألم شديد جداً ويصيبها شفع فتصير تشوف طارق تنين طارق 💔
بتدوخ، بتستفرغ، بتفقد توازنها.. وممكن حتى حركاتها إحساساتها تصير صعبة إذا نخاعها كان متأذي 💔
وقت فلوديا تتحمم بمي سخنة أو تتعرض لحرارة عالية بالصيف تجيها نفس الأعراض يلي سبق وذكرناها بتضل معها يوم وبعدها بتتراجع..
وممكن فلوديا تعاني من الصرع، الاكتئاب، مشاكل ذهنية وجنسية وكتير من القصص التانية والأمور الصحية السيئة 💔
سبب هالألم هوي مرض يدعى #التصلب_اللويحي_المتعدد أو #Multiple_Sclerosis
وهو عبارة عن مرض مناعي ذاتي لحد الآن يعتبر مجهول السبب.. ما منعرف ليش هيك المناعة بتشتغل بطريقة غلط وبتروح تهاجم #الميالين أو #النخاعين بالجهاز العصبي المركزي بشكل محدد لتعمل كل هالمشاكل العصبية الكارثية 💔
المرض هاد بيجي بمعظم الحالات بشكل هجمات بتوقف وبترجع بتجي يعني نوبي.. بحيث المناعة بتخرب والمناعة بترمم وهكذا دواليك..
من الفئات المعرضة للإصابة ب التصلب اللويحي:
بصيب الناس بجميع الأعمار بس شائع أكتر بأعمار الشباب وبحب الإناث أكتر من الذكور..
في مجموعة عوامل خطر تتهم أنها السبب بحدوث التصلب اللويحي منها :
- الوراثة.
- البيئة.
- السلوك الغذائي.
- الفيروسات.
- التدخين.
وشي مهم أنو تلاحظ تراجع الأعراض خلال فترة الحمل عند المريضات فحطينا إشارة استفهام قدام الأستروجين!
بيتشخص المرض بمعايير سريرية، شعاعية ومخبرية.
العلاج:
لا يهدف للشفاء لأنو الطب ما زال غير قادر على محاربة الأمراض المناعية للأسف لكن نحنا منعطي أدوية بالهجمات الحادة لنخفف من الأذيات الحاصلة ومنعطي دوا وقائي لنخفف من شدة وتواتر الهجمات عند المريض.. بالنهاية كل مريض الو خطة علاج خاصة فيه حسب حالتو 👌🏻
وكمان لازم نعرف أنو رغم كل هالألم يلي ذكرناه إلا أنو المرض لا يعتبر معطل للحياة ولا بينقص من مأمول حياة صاحبو وكتار من المرضى متعايشين معو ولو حتى اجا بشكلو الصعب.. وبتقسم شدتو لتلت أتلات.. تلت خفيف، تلت متوسط، تلت شديد.
فلوديا أو #الممثلة_مروة_الأطرش كانت خير مثال عن حدا عم يقاوم مرض التصلب اللويحي وعم ينتصر عليه.. ما خلت مرضها يوقفها عن أنها تأنجز وتستمر ❤️
خلينا دوماً نصنع من آلامنا انتصارات ونتذكر دوماً أنو الروح يلي خلقها الله أقوى من الحياة ومن كل مصاعبها.. فقط لأنها من صنيع الله ❤️
خليني بس نوّه أنو مريض التصلب اللويحي قادر يتزوج ويعيش عادي بس القرار بيرجع الو بالنهاية ولوضعو لأنو ممكن يكون في مشاكل جنسية أو ذهنية أو هجمات متكررة تخليه يعدل عن فكرة الزواج لكن علمياً ليس بقاعدة عامة.. ونصحح سوا أنو هالمرض ما بقصّر العمر بتاتاً 👌🏻
كنت معكم سَماح صالح محمد ❤️
كل الحب لمروة ولكل مرضى التصلب ولكل مريض عم يقاوم مرضو والحياة سوا ليبقى 🙏🏻
المصدر :
مرجع الباطنة العصبية في كلية الطب البشري في جامعة دمشق.