تصحيح مفاهيم وتوعية خاصة بمرضى السكري

إلى مرضى السكري 🙋🏻‍♀️

أنتَ مريض سكري وجعك راسك قام نطيت على

صيدلية البيت عندك لتاخدلك مسكن..

السيتامول خالص وما الك مروة تروح تجيب ظرف ولا

الجيبة بتسمح بس في بروفين حلو وحباب وقاعد عم

وأنتَ بالفعل بتاخدو وأووه متل السحر بروح الوجع 😍

بعد يومين تكرر المشهد أعلاه وكذلك بعد ٣ وبعد أسبوع وهكذا دواليك!

هنيك بخاصرتك في كلية عم تنوح وتولول أنو ليش الله حطني بجسم واحد مو واعي 🙂💔

طيب يا غالي أنا بعرف القلب بحبني وعاطيني تروية

من عندو غير شكل بس في سكر مرتفع وهالسكر

أحسن من كتير سناغل 🌚 بيرتبط بالبروتين وبروح

عالأوعية بضيقها بيقبضها بيضغطها فبيقلل كمية الدم

يلي رايحة لعندها.. لهون القصة حزينة بس مقبولة..

بيجي هاد المسكن الشرير البروفين يلي اسمو العلمي

#NSAIDs أو مضادات الالتهاب اللاستيروئيدية

هاد بزيد تقبض الشرايين بالكلية بالزايد فبزيد نقص التروية وروح بقى المشاكل 💔

بالكلية في قشر ولب.. اللب محل ما الأنابيب البولية

بتفتح لتكب البول عالحالب.. هالمنطقة ترويتها أقل من

القشر بالحالة الطبيعية ومع نقص التروية يلي صاير

بالسكري ويلي متفاقم بالأدوية بتتنخر الحليمات بهاللب

وممكن حتى تهرّ بالحالب وتسدو وتعمل استسقاء كلوي!

وممكن تنزل مع البول ويشوفها المريض مع بولو

ويشوف دم.. بترتفع حرارتو وبتوجعو خواصرو وبعاني من ألم بالتبول كمان!

منشخصها بالقصة المرضية وفحص البول والأشعة إيكو أو طبقي.

التوعية أنو تتوقف هالأدوية ونخبر المريض أنو ممنوع

ياخذها وخاصةً بجرعات عالية وتكرار كبير..

ومن هنا وجبت علينا التوعية والتوصية تجنباً لهالكوارث كلها هي!

عدا عن أنو ال NSAIDS بترفع الضغط عند مريض

السكري وهاد كمان بفاقم أذية الكلى إن كان المريض معو

اعتلال كلية سكري وبتروح كل فائدة وفعالية الأدوية الخافضة للضغط!

لذلك مرضى السكري كونوا واعيين شو عم تاخدوا أدوية كرمال صحتكن ❤️

كونوا بخير ❤️

كنت معكم سَماح صالح محمد ❤️