بتتذكروا حلقة ضيعة ضايعة عن الكلاوي؟
وقت بيطلع عند أسعد ٣ كلاوي وحدة هيك ووحدة هيك ووحدة عاملة هيك .
المهم جودة وقتها بغار وبطّق من الحسد ف تقترح عليه ديبة يروح يفحص مثل أسعد ممكن يطلع عندو مثل أسعد، هو وقت يروح يفحص ومتأمل ب٤ كلاوي بيطلع عندو كلية خربانة والتانية عالطريق 💔😅
السؤال: جودة ما كان يعاني من ولا عرَض ولا ألم ولا شي بس وقت صوّر طلع الزلمة خسران كليتو فهل هالكلام هبد دراما ولا علمي صحيح؟
يبدو د.ممدوح حمادة سائل دكاترة قبل ما يكتب النص، والذي حدث مع جودة صحيح وواقعي علمياً.
هلق منجي للمقالنا:
منسميها لهالكلية طبياً الكلية_الصامتة.
ماهي الكلية الصامتة؟
هي كلية تكون تعاني وتنازع ومتوّقف شغلها تماماً بس ما قادر تطّلع عليها ولا عرض، ونتيجة أن أختها تشتغل عنها فعملية التبول ماشية تمام وعال العال والمريض مثل الأطرش بالزفة 😅 وللأسف فغالباً أمراض الكلى تتصف بالصمت، وبالفعل لا تخاف إلا من النهر الهادي 🤷♀️
و في معلومة حلوة عن الكلية أن شغلها من راسها، أي الجهاز العصبي لا يتدخل فيها يعني الدماغ مدير وهي مديرة 😅 لكنها تتعاون مع الدماغ وتبقى بحاجته وقت تتألّم،
ولكن تعصيبها فقط ألمي لتخبّر صاحبها أحياناً أن هناك كارثة انتبه!
زراعة الكلية:
عندما نزرع كلية جديدة نحن نعيد لها ترويتهاوحالبها ولكن لا نعيد لها أعصابها،
فالكلية الجديدة لا تؤلم صاحبها وهذاالشي ليس جيد لأن مهما صار فيها من مشاكل لا تعبر عن أذيتها.
اقرأ حول جهاز غسل الكلى وآلية عمله
بالختام:
آخر شي رح خبركن عنه هو أن الكلية نعمة من الله
تخيلوا أن الكلية تصفّي دمنا ٣٦ مرة يومياً!
كل يوم بفوت عليها ١٨٠ ليتر دم لتنضفن وتطلعن بالشكل القابل للحياة، إنها الفلتر السوبر هيرو.
وقت تشوفوا مرضى غسيل الكلى وقديه بيتعذبوا حتى مع الأجهزة، بتقدّروا قديه الله فعلاً خلق الإنسان في أحسن تقويم ❤️
على أمل يبقى الطب والفيزيا يتطوروا ليبقوا يساعدوا الإنسان بحل مشاكله وأزماته ❤️ وحدو العلم هو الناجي الوحيد.
كنت معكم الدكتورة سَماح صالح محمد ❤️
المصدر :
مرجع الباطنة_كلية في كليّة الطب البشري في جامعة دمشق.