الربو Asthma ماهو؟
الربو Asthma يعني مرض تنفسيّ التهابي مزمن.
الرئة هي البالونة المسؤولة عن عمليات تصدير واستيراد الغازات من وإلى الجسم وبهالرئة في طرق.. طرق بتيّسر مرور الهواء.. هالطرق لازم تبقى مفتوحة وواسعة ونضيفة.
بالربو بتنسد هالطرق.. بسدّها المخاط يلي زايد إفرازو من تضخم الغدد المفرزة الو.. بتسدّها العضلات المتقبّضة المنجعصة على غير العادة.. بتسدّها خلايا جيش الكريات البيض الالتهابية.. وفوق الموتة عصّة قبر.. فوق كل هالمواد السّادة بصير في انفعال من هالطرق بحيث بتتضيق بشكل مبالغ فيه رداً على أمور كتير صغيرة متل فوتة حبة طلع صغيرة.. صغيرة جداً!
ماهي الأعمار التي يصيبها Asthma؟
بصيب كل الأعمار بس أكتر من نص حالاته تصيب الأطفال بعمر ال 10 سنين.
إما يبدأ من عمر صغير 3 سنين وهنا يكون هناك فرصة للمريض أن يشفى عفوياً مع تقدمه بالعمر.. هذا النوع تتحرض فيه نوبة الربو على مواد محسسّة لذا نسميه الربو التحسسي.
أو أن يبدأ بعمر ال 15 ل 25 وهنا تبدأ نوبة الربو وتأتي على أسباب غير واضحة.. ولا يمكن تحديد كيف تتأزم حالة المريض.
من هي الفئات عالية الخطورة للإصابة بالربو؟
- الذكور أكثر من الإناث.
- السود أكثر من البيض.
- وأنو يكون في بالعيلة أمراض تحسسية.. ربو، أكزيمه، شري..
هل الربو وراثي؟
ما فينا حددنا مورثة معينة مسؤولة عن الربو.. هي مجموعة مورثات يعني فينا نقول #استعداد_وراثي لكن في كتير مرضى حقيقةً ما لاقينا تفعيل لهالمورثات يلي منقول عنها أنها مسؤولة عن ظهور الربو عندهم .
الحازوقة (أسبابها وطرق للتخلص منها)
هل للبيئة دور في الربو Asthma؟
عم تتسجل أكتر نسب للربو بالبلدان الصناعية متل أمريكا مثلاً وبشكل كتير كبير.. فنعم التلوث الو دور.. وكمان قال إذا الطفل متعرض بطفولتو لأمراض تنفسيّة فيروسية وخاصةً ذات الرئة فبكون معرّض للإصابة بالربو!
وقال إذا مطعمايين الطفل أكل مو مناسب لعمرو يعني برغل ععمر الشهر 😂 فكمان بكون معرّض للإصابة!
ما هي المواد التي يمكن أن تحرّض نوبات الربو؟
أشيع وأهم المحرّضات هي:
- الأمراض الفيروسية
فكورونا حالياً على مريض ربو بحرّضلو النوبات وبتصعب حالتو للأسف 💔
- الحيوانات الأليفة
- الصوف
- حبات الطلع والربيع يلي مش ربيع
- حتى مخلفّات الصراصير بتحرّض الربو 🤮
- المواد المخرّشة من دخان وعطر وريحة كلور.. دهان.. أي شي بخرّش.
ومنشان الدخان في معلومة بتقول أنو مستحيل نلاقي مريض ربو مدّخن وقتها بكون مع المريض ربو مع COPD.
- ويوجد أدوية تحرّض الربو متل مضادات الالتهاب اللاستيروئيدية متل البروفين مثلاً.
كذلك حاصرات بيتا اللاانتقائية .. لذلك مهم جداً ننتبه للأدوية يلي عم ناخدها إذا كنا مرضى ربو.
- المواد الحافظة متل مادة أحادي غلوتامات الصوديوم يلي بيستخدموها بحفظ المواد الغذائية وموجودة كمان بالأندومي.. بطلوا أندومي يا مرضى الربو.
- الشدة النفسية من قلق وحزن وحتى ضحك لهيك إذا كنت حابب بنت مريضة ربو وقالتلك رد عليي عم اختنق فهي فعلاً قاصدتها
حتى الهوا البارد بحرّض نوبات الربو تخيلوا 💔
رح أعطيكم هالمعلومة ونكمل بكرا كلام عنو ❤️
المعلومة أنو في نوع للربو اسمو الربو الطمثي بحيث بتتحرض النوبات وقت الدورة الطمثية 🙂
وفي ربو قلبي بكون مريض قصور قلب احتقاني فبصير معو نوبات ربو من ورا الوذمة يلي بيعملها هالقصور 💔
لكن مربض الربو ما بيتأثر قلبو ولا بصير معو قصور قلب من ورا الربو
يتبع..
سَماح صالح محمد♥️