بدك تعرف كيف تدرس وتشتغل بلا نعس وتفيق مصحصح بلا ألف فنجان قهوة وسطل نسكافيه ؟
فيق الساعة 8 الصبح رح تسألني ليش !
رح قلك أنو في هرمون بجسمك اسمو الكورتيزول باللام وليس النون مسؤول هالهرمون الحباب عن الاستجابة للشدة وشو في شدة أكتر من زنقة الامتحانات 🥲
هالهرمون بس ينفرز بيرفع سكر الدم بيطعمي الخلايا بيرفع الضغط بزدلك الدم لراسك ليعرف يشتغل يعني باختصار هوي #هرمون_الصحصحة_والعمل_والإنتاج 💃
اين يفرز هذا الهرمون؟
إفراز هالهرمون بيجي من الغدة الكظرية يلي بخاصرتك فوق كليتك وهذي الغدة الجميلة بتفرزو بطريقة إيقاعية موسيقية فهوي بكون بأعلى مستوياتو عالصبح الساعة 8 وبينخفض للنص عالساعة 4 العصر وقت الغدا والقيلولة 🥱 وبيوصل لأخفض مستوياتو في منتصف الليل وقت بتفيق أنت لتدرس 😂

اي بس الجسم بيتكيف مع زنقاتك لهيك بوقت الامتحانات بيرجع برتب حالو الهرمون عالإفراز بالعكس بما يناسب وضعك بس المهم المهم ما تهلكو بعدم التنظيم لهيك نصيحتنا الدائمة نام ايمت ما بدك فيق ايمت ما بدك بس بانتظام منشان جسمك ما يدوخ وهرموناتك تسبك 🤫
بالختام:
ويا حبذا تكون عالطبيعي متل ما هالغدد متعودة بتكون وفرت عليها شغل وطاقة .. رسالة جسمك الك ادرس كل محاضرة بمحاضرتها ببوس ايدك لا تزنقنا وروق ❤️
بتمنالكم امتحانات موفقة وكورتيزول معتدل ❤️
كنت معكم سَماح صالح محمد ♥️
المصدر :
محاضرة الغدد أطفال في كلية الطب البشري في جامعة دمشق.